Mundarija
Kirim-chiqim hisobi nimaga kerak
Kechqurun qutini sanaysiz, 300 ming so'm kam chiqadi. Kimga berildi, nimaga ketdi, esga tushmaydi. Har bir chiqimni daftarga yozib borsangiz ham, karta va P2P pullari boshqa yo'l bilan yuradi va umumiy rasm ko'rinmaydi.
Kassa hisobi bitta oddiy formulaga tayanadi: kun boshidagi qoldiq + kirim − chiqim = qutida turishi kerak bo'lgan pul. Ekrandagi raqam bilan qutidagi pul bir xil chiqsa, kun to'g'ri yopilgan bo'ladi.
Bir kunlik kassa
- Kun boshida1 200 000
- Sotuvdan+ 3 500 000
- Qarz to'lovlari+ 800 000
- Xarajatlar− 450 000
- Yetkazib beruvchiga− 2 000 000
Kun oxirida3 050 000
1 200 000 + 4 300 000 − 2 450 000 = 3 050 000
Naqd, karta va P2P uchun alohida kassa
Qutidagi naqd bilan kartaga tushgan pul ikki xil pul. Ularni bitta raqamda yuritsangiz, qutini sanaganda hisob hech qachon to'g'ri chiqmaydi. Ilovada har bir pul turi uchun alohida kassa ochasiz: Asosiy kassa, Karta, P2P, terminal yoki ikkinchi smena.
- Bosh sahifada Kassani oching va Kassa qo'shishni bosing.
- Nomini yozing, masalan «Terminal», va Qo'shishni bosing.
- Kassa ichida tishli g'ildirak belgisini bosib, Kassa sozlamalarini oching.
- Qaysi to'lovlar shu yerga tushadi ro'yxatida kerakli usulni yoqing: Naqd, Karta, P2P yoki O'tkazma.
- Saqlashni bosing.
Shundan keyin shu usulda kelgan qarz to'lovi, sotuv va nasiya puli o'zi shu kassaga tushadi. Bitta to'lov usuli faqat bitta kassaga tegishli bo'ladi. Naqd pulga belgi qo'yilmagan bo'lsa, u asosiy kassaga tushadi.
Start tarifida kassa bitta. Karta va P2P puli ham ko'rinib turishi uchun ularni shu kassa sozlamalarida belgilab qo'ying, aks holda naqdsiz to'lov kassaga tushmaydi.
Qaysi pul kassaga o'zi tushadi
Har bir amalni ikki joyga yozish shart emas. Ilovaning boshqa bo'limlari kassani o'zi to'ldirib boradi, siz faqat to'lov usulini to'g'ri tanlaysiz.
| Amal | Kassaga ta'siri |
|---|---|
| Sotuv | To'langan summa o'z usuli kassasiga kirim bo'ladi |
| Qarz to'lovi | Kirim bo'ladi, do'kon sozlamalarida Qaytgan qarzlar kassaga tushsin yoqilgan bo'lsa |
| Nasiya to'lovi | Kirim bo'ladi |
| Xarajat | Naqd, karta yoki P2P bo'lsa, chiqim bo'ladi |
| Yetkazib beruvchiga to'lov | Chiqim bo'ladi |
| Xodimga oylik yoki avans | Xarajat orqali chiqim bo'ladi |
| Boshqa usuli | Kassaga tegmaydi: masalan, tovar bilan hisob-kitob |
Kassaga kirim va chiqimni qo'lda yozish
Ba'zi pul hech qaysi bo'limdan o'tmaydi: ertalab qutiga mayda pul qo'ydingiz yoki kunlik tushumni uyga olib ketdingiz. Bunday pulni kassaning o'zida yozasiz.
- Kassani oching va pastdagi Kirim yoki Chiqim tugmasini bosing.
- Summani yozing va valyutani tanlang.
- Pul aynan bir mijozga tegishli bo'lsa, Mijoz (ixtiyoriy) qatoridan uni tanlang: kirim uning to'lovi bo'ladi, chiqim esa unga berilgan pul sifatida qarziga qo'shiladi.
- Kategoriya va izoh qo'shing. Pul boshqa kuni olingan bo'lsa, sanani ham o'zgartiring.
- Kerak bo'lsa chek rasmi yoki ovozli xabar biriktirib, Saqlashni bosing.
Ijara, svet yoki transport kabi do'kon xarajatini esa Xarajatlar bo'limidan yozing: summa kassadan baribir chiqadi, ustiga xarajatlar hisobida kategoriyasi bilan ko'rinadi. Kassadagi Chiqim tugmasi xarajatlar ro'yxatiga tushmaydi.
Kassalar o'rtasida pul o'tkazish
P2P'ga tushgan pulni naqdga chiqardingiz yoki smena pulini asosiy kassaga topshirdingiz. Buni chiqim va kirim qilib yozsangiz, do'kon aylanmasi sun'iy ko'payib ketadi. Buning uchun kassalar ro'yxati ostida Kassalar o'rtasida o'tkazish tugmasi bor: Qayerdan, Qayerga, summa va valyutani tanlab, Saqlashni bosasiz.
O'tkazma do'konning umumiy kirim-chiqimiga qo'shilmaydi, pul faqat bir kassadan boshqasiga o'tadi. So'm so'mligicha, dollar dollarligicha o'tkaziladi. Dollar va so'm hisobi haqida alohida yozganmiz.
Kun oxirida kassani qanday tekshirish kerak
- Qutini sanangNaqd pulni qo'lda
- Balansga qarangKun bo'yicha
- Farqni topingYozilmagan amal bormi
- Hisobot olingImzo bilan PDF
Kassa ichida davrni tanlaysiz: Kun, 7 kun, Oy, O'tgan oy, Butun davr yoki O'z davri. Kassa balansi shu davr oxirida kassada turgan pulni, oldingi oylardan qolgani bilan birga, ko'rsatadi. Davr boshida esa davr boshlanishidagi qoldiq. Qutidagi pul balansdan farq qilsa, sabab odatda shulardan biri:
- xarajat yoki chiqim yozilmay qolgan;
- to'lov Boshqa usulida yozilgan, u kassaga tushmaydi;
- karta yoki P2P puli boshqa kassada turibdi;
- do'kon sozlamalarida Qaytgan qarzlar kassaga tushsin o'chirilgan;
- kassadagi yozuv qo'lda o'chirib yuborilgan.
Smena topshirganda yoki oy yakunida kassa ichidagi printer belgisi Kassa hisobotini ochadi. Unda davr boshidagi qoldiq, kirim, chiqim, davr natijasi va oxirgi qoldiq turadi, pastida kassir va rahbar uchun imzo joyi bor. Hisobot PDF bo'lib chiqadi: chop etasiz yoki yuborasiz. Kassadagi pul nima uchun foydaga teng emasligini do'kon foydasini hisoblash maqolasida tushuntirganmiz.
Kassa Start tarifidan ishlaydi: Startda 1 ta, Savdoda 3 ta kassa, Biznes va undan yuqorida kassalar soni cheklanmagan. Yangi foydalanuvchilar uni 7 kunlik bepul sinov davrida ishlatib ko'rishi mumkin.
Ko'p so'raladigan savollar
Kirim chiqim daftarini telefonda yuritsa bo'ladimi?
Ha. Qarz Daftari ilovasining Kassa bo'limida kirim va chiqim yoziladi, qoldiq o'zi hisoblanadi. Sotuv, qarz to'lovi va xarajatlar kassaga o'zi tushadi.
Nechta kassa ochish mumkin?
Start tarifida bitta, Savdo tarifida uchta, Biznes va undan yuqorida cheklovsiz.
Karta orqali kelgan pul qaysi kassaga tushadi?
Sozlamalarida Karta belgilangan kassaga. Hech qaysi kassada belgilanmagan bo'lsa va tarif imkon bersa, birinchi karta to'lovida «Karta» nomli kassa o'zi ochiladi.
Kassalar o'rtasidagi o'tkazma hisobotga ta'sir qiladimi?
Yo'q. O'tkazma do'konning kirim va chiqimiga qo'shilmaydi, faqat ikki kassaning qoldig'ini o'zgartiradi.
Kassa nega qutidagi pulga to'g'ri kelmayapti?
Ko'pincha xarajat yozilmay qolgan yoki to'lov Boshqa usulida kiritilgan bo'ladi. Karta va P2P pullari alohida kassada turganini ham tekshiring.
Kassa hisobotini chop etsa bo'ladimi?
Ha. Kassa ichidagi printer belgisi tanlangan davr uchun PDF hisobot chiqaradi: qoldiqlar, kirim, chiqim va imzo joylari bilan.