Qarz Daftari Русский Kirish

Qarz daftari ilovasi: do'konda qarzlarni telefonda yuritish

6 daqiqa o'qish Tarif: Bepul

Qarz daftari ilovasi do'kondagi qog'oz daftarning o'rnini bosadi: kim qancha olgani, qancha to'lagani va qancha qolgani telefoningizda turadi, qoldiqni qo'lda hisoblamaysiz. Quyida daftarni telefonga qanday ko'chirish, qarz va to'lovni qanday yozish, xatoni qanday tuzatishni Qarz Daftari'ning haqiqiy ekranlari va video darslar bilan ko'rsatamiz.

Mundarija
  1. Qog'oz daftar qayerda pand beradi
  2. Qarz daftar ilovasini yuklab olish (skachat)
  3. Birinchi mijoz va birinchi qarzni yozish
  4. Mijoz pul olib kelganda: to'lov va qoldiq
  5. Eski daftardagi qarzlarni qanday ko'chirish kerak
  6. Xato yozib qo'ydingizmi? Tuzatish oson
  7. Qarz vaqtida qaytishi uchun
  8. Ilovada nimalar bepul

Qog'oz daftar qayerda pand beradi

Baqqollikda, novvoyxonada yoki bozordagi rastada qarz daftari hali ham kerak: mijoz «yozib qo'ying, oylik olganda beraman» deydi, siz yozasiz. Qiyini keyin boshlanadi. Bir odamning qarzi uch-to'rt varaqqa tarqaladi, qaysi biri to'langanini chizib o'tirasiz, ish qizigan paytda esa summani noto'g'ri qo'shib yuborish hech gap emas.

Daftar yo'qolsa, ho'l bo'lib qolsa yoki shogirdingiz boshqa betga yozib yuborsa, hisobni tiklab bo'lmaydi. Mijoz «men buncha olmaganman» desa, ko'rsatadigan aniq narsa ham qolmaydi.

Daftarda

  • Qoldiqni qo'lda hisoblaysiz
  • Qarzdorni varaqlab qidirasiz
  • Muddat esdan chiqadi
  • Daftar yo'qolsa, hisob ham ketadi

Ilovada

  • Qoldiq o'zi hisoblanadi
  • Ism yoki raqam bilan topasiz
  • Muddat kuni bildirishnoma keladi
  • Telefon almashsa ham hisob turadi
Bir xil qarz daftarda va ilovada qanday yuritiladi.

Qarz daftar ilovasini yuklab olish (skachat)

Ilova iPhone va Android uchun bor. App Store yoki Google Play'ni oching, Qarz Daftari deb qidiring va o'rnating. Telefon raqamingizni yozasiz, kelgan kodni kiritasiz, parol o'ylab o'tirmaysiz. Kompyuterda ishlamoqchi bo'lsangiz, shu hisob brauzerdagi veb-versiyada ham ochiladi.

Birinchi mijoz va birinchi qarzni yozish

  1. Pastdagi Mijozlar bo'limini oching va Yangi mijoz qo'shish tugmasini bosing.
  2. Ism va telefon raqamini yozib, Saqlashni bosing. Raqam majburiy emas, lekin eslatma aynan shu raqamga boradi.
  3. Mijoz kartasida qizil Qarz qo'shish tugmasini bosing.
  4. Summani so'mda yoki dollarda kiriting. Izohga nima olganini yozing, masalan, «2 qop un va shakar».
  5. Qaytarish kunini aytgan bo'lsa, Qaytarish sanasini ko'rsatishni yoqib, kunni tanlang.
  6. Saqlashni bosing. Qarz kartaga tushdi, jami qarz o'zi yangilandi.
Video dars 1 Yangi mijoz qo'shish va qarz yozish Telegram'da ko'rish YouTube'da ochish
Qarz daftari ilovasida mijozlar ro'yxati: har bir mijozning qarzi, qarzdorlar soni va jami qarz
Mijozlar ro'yxati: kim qancha qarzdor, tepada jami qarz.
Mijoz kartasi: so'mdagi qarz, qo'ng'iroq va xabar tugmalari, Qarz qo'shish va To'lov qabul qilish
Mijoz kartasi: qoldiq va ikkita asosiy tugma.

Qarz yozayotganda surat ham biriktirsa bo'ladi: nakladnoy, tilxat yoki chek. Keyin mijoz e'tiroz bildirsa, suratni ochib ko'rsatasiz.

Mijoz pul olib kelganda: to'lov va qoldiq

Mijoz kartasidagi yashil To'lov qabul qilish tugmasini bosib, summani va to'lov usulini tanlaysiz: naqd, karta, P2P yoki boshqa. To'lov bitta yozuvga emas, mijozning umumiy qarziga tushadi: avval eng eski qarz yopiladi, keyin navbatdagisi. Shuning uchun qisman to'lovni ham bemalol yozaverasiz, hech narsani qo'lda ayirmaysiz.

Karim aka, noyabr

  • 3-noyabr, un250 000
  • 10-noyabr, yog'150 000
  • 15-noyabr, to'lov− 100 000
  • 20-noyabr, shakar80 000
  • 25-noyabr, to'lov− 130 000

Qoldiq250 000

480 000 olgan − 230 000 to'lagan

Namuna: qarzlar va to'lovlar bitta kartada, qoldiq o'zi chiqadi.

Mijozlar ro'yxatida har bir qarzdorning qoldig'i ko'rinib turadi, tepada esa qarzdorlar soni va jami qarz. Kim qancha berishi kerakligini bilish uchun varaq titkilash shart emas. Qidiruv, saralash va statistika haqida mijozlar bazasi maqolasida yozganmiz.

Do'kon qarzdorlari

  • Karim aka 250 000
  • Dilnoza opa Kechikdi 480 000 muddati 1-noyabr edi
  • Nodira opa 120 000 muddati 5-dekabr
  • Rustam aka 0

Jami qarz850 000

Namuna: ro'yxatda kim qancha qarzdorligi bir qarashda ko'rinadi.

Eski daftardagi qarzlarni qanday ko'chirish kerak

Daftarni bir kunda ko'chirishga urinmang. Avval hozir qarzi borlarni kiriting: har biriga bitta yozuv, summasi — qolgan qarzi. To'lab bo'lgan eski qarzlarni ko'chirish shart emas.

Yozuv o'zi bugungi sana bilan tushadi, lekin formadagi sana tugmasidan qarz olingan kunni tanlash mumkin: shunda tarix to'g'ri tartibda turadi. Qarzdorlaringiz Excel jadvalida bo'lsa, Savdo tarifida ularni birma-bir yozmay, Excel'dan ko'chirish mumkin.

Xato yozib qo'ydingizmi? Tuzatish oson

Pastdagi Tarix bo'limida barcha qarz va to'lovlar kunlar bo'yicha turadi. Filtrlar orqali kerakli mijozni tanlaysiz, yozuv yonidagi uch nuqtani bosib Tahrirlashni tanlaysiz. Summani to'g'rilab saqlasangiz, mijoz balansi o'zi qayta hisoblanadi.

Keraksiz yozuvni shu menyudan O'chirish mumkin. O'chirilgan yozuv darhol yo'qolib ketmaydi: 30 kun davomida Sozlamalardagi Yaqinda o'chirilganlar bo'limidan qaytarib olasiz.

Video dars 4 Xato yozuvni tuzatish Telegram'da ko'rish YouTube'da ochish
Tarix bo'limi: qarz va to'lovlar kunlar bo'yicha ro'yxat
Tarix: barcha yozuvlar kunlar bo'yicha.
Qarz yozuvining menyusi: Tahrirlash va O'chirish
Uch nuqta: tahrirlash yoki o'chirish.

Qarz vaqtida qaytishi uchun

Yozib qo'yishning o'zi pulni qaytarmaydi, eslatib turish kerak. Qaytarish kuni ertalab ilova sizga bildirishnoma yuboradi: bugun kimning muddati kelgan. Mijozning o'ziga esa avtomatik SMS eslatma yoki robot qo'ng'iroq borishi mumkin: ular bir marta sozlanadi va paket hisobidan ishlaydi. Kechikkan qarzlar bilan nima qilishni qarzni undirish maqolasida o'qing.

  • Har bir qarzga sana qo'ying. Sanasiz qarz hech qachon «kechikkan» bo'lmaydi va ro'yxatda ajralib turmaydi.
  • Izohni erinmay yozing. «Un, 2 qop» degan bir qator keyingi bahsni yopadi.
  • To'lovni o'sha zahoti kiriting. Kechga qoldirsangiz, mijozga noto'g'ri qoldiq aytib qo'yasiz.
  • Telefon raqamini so'rang. Raqam bo'lmasa, na SMS, na qo'ng'iroq yetib boradi.

Ilovada nimalar bepul

Qarz va to'lov yozish, mijozlar ro'yxati, tarix, suratlar, PDF va Excelga chiqarish bepul ishlaydi. Bepul rejimda 50 tagacha mijoz va oyiga 300 tagacha yozuv (qarz va to'lov birga) qo'shasiz. Chegaraga yetsangiz, yozilgan ma'lumot o'chmaydi, faqat yangisini qo'shish to'xtaydi. Start tarifi bu chegarani olib tashlaydi, ovozli izoh, kassa va xarajatlar hisobini ham ochadi.

Qarz daftari bepul ishlaydi: 50 tagacha mijoz va oyiga 300 tagacha yozuv. SMS va robot qo'ng'iroqlar alohida paket bilan ishlaydi.

Ko'p so'raladigan savollar

Qarz daftar ilovasini qayerdan yuklab olish mumkin?

iPhone uchun App Store'dan, Android uchun Google Play'dan: Qarz Daftari deb qidiring. Kompyuterda brauzer orqali veb-versiyada ishlash mumkin.

Qarz daftari ilovasi bepulmi?

Ha, qarz va to'lov yozish bepul. Bepul rejimda 50 tagacha mijoz va oyiga 300 tagacha yozuv qo'shiladi, undan ko'pi uchun Start tarifi kerak.

Telefon yo'qolsa, qarzlar ham yo'qoladimi?

Yo'q. Hisob telefonda emas, serverda saqlanadi. Yangi telefonga ilovani o'rnatib, o'sha raqam bilan kirsangiz, hamma yozuvlar joyida bo'ladi.

Dollarda qarz yozsa bo'ladimi?

Ha. Qarz formasida so'm yoki dollarni tanlaysiz, ikki valyutaning balansi alohida yuritiladi va bir-biriga qo'shilmaydi.

Yozuvni o'chirib yuborsam, qaytarsa bo'ladimi?

Ha. O'chirilgan yozuv 30 kun davomida Sozlamalardagi Yaqinda o'chirilganlar bo'limida turadi, u yerdan qaytarib olasiz.

Mijozning telefon raqamini yozish shartmi?

Yo'q, ism yetarli. Lekin SMS va qo'ng'iroq eslatmalari faqat telefoni yozilgan mijozlarga boradi.